তোমারে লইয়া হারাদিন ওলা চিন্তা করি
যেমলা চইত মাস আইলে আব্বায় চিন্তা করইন
কিলা ধান তুলা যায় ঘরও,পানি আওয়ার আগে আগে

চিন্তায় কিতা আর ধান ঘরও তুইল্লা দেয়—খও?
কাম করন লাগে, কাঁচি লইয়া বন্দো গিয়া
ধানকাটা লাগে, কাটা ধান ঝাঁকাত ভইরা লইয়া
বোমায় মাড়া দেয়া লাগে, মাড়া দেয়া ধান
বস্তাত ভইরা টলি দিয়া বাড়িত আনা লাগে
বাড়িত আনা ধান রইদো দিয়া হুকানি লাগে
রইদো হুকানি ধান ছুছা ছাড়াইয়া—
ঘরও তুলা লাগে
ঠাইলও ভরা লাগে

তুমি ঠিক ওমলা আমার কাছে চইত মাস
বুরো ধান, কিলা ঘরও তুলতাম, খালি চিন্তা অয়।