ঘটা করিয়া খটা মিয়ায়
খরছইন একখান হেংগা
এখন তানোর ঘরো লাগে
খালি খালি বেংগা।

কিতার লাগি বেংগা অতো
চিন্তা খরিয়া ফাইন্না
মনমরা তাইন অইয়া ঘুরাইন
ভাত উত কিচ্ছু খাইন্না।

ঘ্যানর ঘ্যানর খালি হুনইন
মায় আর বউয়ে খররা
লাগা বাড়ির বেটিয়ে আইয়া
মুখো আতো ধররা।

মাঝে মইধ্যে খান্দা খাটি
সফাসফিও হুনা যায়
খেউ খারোর ছাইন্না বালা
মুখ দেখাও হারাম হায়।

আখতা এখদিন ফড়লো ধরা
খটা মিয়ার নজরে
লাগা বাড়ির বেটিয়ে আইয়া
মাইর লাগাইন ফজরে।

ঘুমো থাকি উঠিয়াও দেখ
বেটি বইছে মার খান্দাত
কিতাকিতি লাগাইয়া দের
উন্দাখালো বউ রান্দাত।

সেব পাইলেও বউরে লাগায়
সখালখানো ফার অয়না
দেখিয়া ইতা খটা মিয়ার
মনখানো তো আর সয়না।

সাফ নিষেধ দিলা একদিন
লাগা বাড়ির বেটিরে
হেদিন থাকিও মায় আর বউয়ে
দিন খাটাইন খাতিরে।