ও বিয়াইসাব থাখো তুমি খাইয়া যাইবায় মাদানে
হাতখরা দি গোস্ত রান্দছইন বিয়াইনে।

ফুরকি থাকি মাছ মারাইছইন রৌ আর তেলাফিয়া
ছোটমাছ দি টেংগা রান্দছইন যাইও তুমি খাইয়া
মজার মজার খানি খাইয়া যাইবায় খাইলকু বিয়ানে
হাতখরা দি গোস্ত রান্দছইন বিয়াইনে।

ছালো থাকি কুমড়া ফাড়ছইন বড়টা বাছিয়া
তরখারীটা রান্দছইন বিয়াইনে মাছোর মাথা দিয়া
অত মজার খানি থইয়া যাইবায় কিলা এখনে
হাতখরা দি গোস্ত রান্দছইন বিয়াইনে।

নারিকেলোর মিঠা রান্দছইন গরুর দুধও আছে
যাইবার সময় লইয়া যাইবায় নাইকল ধরছে গাছে
খাইয়া লইয়া যাইবায় তুমি না খরিও না এখনে
হাতখরা দি গোস্ত রান্দছইন বিয়াইনে।