ঐ ঢাক্ কাউয়া তুই দোপর বেলায়
                 চেঁচাইস ক্যানে কা কা কা।
ঐযে গাছোত্ পাকছে আটিয়া কলা
                          তাকে ঠোকরে খা।।
এই যে ছাওয়া গেইছে দুরান্তর মোর
                     ঢাকাত্ পড়িবার,
অনেক দিন হৈল আইসে না তাঁয়
                    খবর নাই ক্যান তার
ও তুই পেট ভরেয়া কলা খেয়াঁ
           ছাওয়াটার মোর খবর কয়াঁ যা।।
এই যে ছাওয়াটা মোর কেমন আছে
              কিবা খাইছে কি নাই খায়
তাকে দেখির দেহাটা মোর
                  ফাটি যাবার চায়
ও মুই পাগলী হয়াঁ চায়া আছোঁ কখন আসি
             ডাকাইবে মোক মা মা মা।
এই যে ঢাকাত্ নাকি কলেজ গুলাত
                 মারা মারি হয়
ওউগ্লা কথা শুনিয়া মোর
                মনোত‌্  নাগে ভয়.
এইবার খালি আইলে বাড়ী ছাওয়াক আর মুই
                        ঢাকাত্ পাঠাইম না।।