(চট্টগ্রামের আঞ্চলিক ভাষায় স্বরচিত)

ঘরর সামনে গালত আতদি
বইয়েরে চিন্তা গরির,
হত কিছু মনত আইয়ির
অবশ অই যার শরীর।

রোজার মাস তো আই গেইয়ি
মনত শান্তি নাই,
শান্তির বাপ মরি গেইয়ি
দুঃখে ফাঁসি হাই।

গোডা বাড়ি হাইল্লা য়ুদা
আঁই আছি এহা,
বওত ডইল্লা চাইয়েরেও
কেয়ুর ন পাইলাম দেহা।

এন উগ্গা সময় আছিল
চাইরুমিক্কা হত জমজমাট,
বেগ্গুনে মিলি আড্ডা দিতু
সাক্ষী পইরর ঘাট।

দিন নাই রাইত নাই
গল্পগুজব চলের,
মনর সুখে কেউ গান গার
কেউ উডানত খেলের।

রাইত অইলি মুরব্বি অক্কল
ডঅর লাগাইতু -
এহন ঘরত গল!
আর নইলি জিনে ধরিবু
অই যাবি পঅল।

বড়জনর হতা শুনি
যার ঘরত তে গেইয়ি,
পররদিন আবার বেগ্গুন
আড্ডা দিতু বইস্সি।

বাপ, চাচা কেউ এহন
একজনও বাঁচি নাই,
আঁরাও একদিন মরি যাইয়ুম
দুইন্নার নিয়মর পাল্লায়।

হন্ডে গেলগুই য়েইদিন
আর কি ফিরি আইবু?
এইল্লা গরি ঘড়ির কেডা
ঘুরি সময় যাইবু ।।