*************

শুকান কলার পাতের সতে
সুপড়ির ঢোঙ্গোল
সামটে জড়ো কচ্চে আরো
এতগুলা জঙ্গল।

তাকে দিয়া আন্দিছে মাও
নাই খড়ির আবদার
চুলা নিবি হোছলো ধুমা
চোউক জ্বলিছে মার।

ফুঁকনি দিয়া ফুঁকি ফুঁকি
জ্বালাইছে আগুন
কষ্ট করি আন্দিছে মাও
ছেলো আন্দার গুণ।

আন্দিছে ভাত শাক-শুকাতি
শুকটার তরকারি
তিপ্তি করি খাইছোং সগায়
দিছোং ঢেকুশ ছাড়ি।

মাও খাইছে সগার শেষোত
হাড়িখান সোত্তেয়া
উমার ভাগোত আছলো কিনা
নাই দেকোংরে চায়া।

খায়া খুশি থাকছে উমরা
না খায়াও খুশি
বুকোত আগলে থুইছে হামাক
যতন করি পুষি।

উমার খালি আছলো চাওয়া
মজা গুয়া-পান
খুঁজি কোনটে পাইমেন কন
হামার মার নাখান।

****************