খরইন খালি আফরবাফর
মনোর মাঝে চিন্তা
মাঝবন্দর জমিনখানাইন
তাইন কিলা কিনতা।
খত খরি বুঝাইলা তারে
হুনাইলা বেশি দামও
বাড়িত আনিয়া খাওয়াইলা
তবুও লাগের না খামও।
আগে খইলো বেছিলাইবো
আখতা করি না খরে
এখন তারে ডাখলে খাছে
হে থাখে দূরে দূরে।
মিডিলিস্টো ফুয়াইন ফাটাইয়া
টেখাওয়ালা অইগেছে
আগে আইতো ডাখোআখো
এখন দেমাখ বাড়িগেছে।
অতা নিয়াও আফরবাফর
যায় তানোর হারাদিন
খইবা খালি বদলিছে দিন
আগে গেছে বালাদিন।